Бүгүнкү күндө мамлекет менен социалдык контракт түзүү үчүн 8 миң 591 аз камсыз болгон үй-бүлө арыз берген. Бул тууралуу Эмгек, социалдык камсыздоо жана миграция министрлигинен билдиришти.
Социалдык контрактты социалдык паспорту бар, же “үй-бүлөгө көмөк” жөлөкпулун алган жакыр жана аз камсыз болгон үй-бүлөлөр түзө алат. «Социалдык контракт» программасына катышуу жөнүндө чечим ыктыярдуу болуп саналат, эч кимдин үй-бүлөсүн өз ишин ачууга мажбурлоого укугу жок.
Эгерде үй-бүлө мамлекеттен бөлүнгөн 100 миң сомго өз бизнесин ачууну чечсе Эмгек, социалдык камсыздоо жана миграция министрлигинин аймактык бөлүмүнө арыз бериши керек. Бөлүмдүн кызматкерлери бизнес-планды жана социалдык адаптациялоо программасын түзүү боюнча, ошондой эле кесиптик даярдоо, кайра даярдоо жана квалификациясын жогорулатуу мүмкүнчүлүктөрү жөнүндө түшүндүрмөлөрдү беришет.
