16-октябрда Өзгөчө кырдаалдар министрлигине Чаткалдагы Ак-Сай тоосунда кар көчкү 6 адамды басып калды деген маалымат келип түшкөн.
Маалыматка ылайык, 9-октябрда тоого эндик өсүмдүгүнүн тамырын казып алууга кеткен боюнча 14 адам кайра үйлөрүнө кайтып келген эмес. Издөө-куткаруу иштеринин негизинде сегиз адам аман-эсен табылган. Алар 14-октябрда Ак-Сай ашуусунда кар көчкү жүрүп, 6 адам жана 16 баш жылкыны басып калганын айтышкан. Учурда куткаруу иштери жүрүүдө.
