Ысык-Көлдө өтүп жаткан Түрк мамлекеттеринин бизнес-инвестициялык форумунун алкагында Кыргызстанда өндүрүлгөн кол өнөрчүлөрдүн жана буюмдардын көргөзмөсү өттү.
КР Соода-өнөр жай палатасынан билдиришкендей, көргөзмөгө түрк мамлекеттеринин соода-өнөр жай палаталарынын жетекчилери келип, коюлган продукциялар менен таанышып, улуттук тамак-аштардан даам татышты.
Иш-чарага министрдин орун басары Эдил Байсалов, Кыргызстанда аккредиттелген өлкөлөрдүн элчилери, Түркия, Азербайжан, Казакстан, Өзбекстан жана Түркмөнстандан, ошондой эле байкоочу өлкөлөрдөн – Венгриядан, Түндүк Кипрден жана Европа палаталарынын өкүлдөрү катышты.
Көргөзмөдө Кыргызстандын бай маданиятын жана салттарын чагылдырган кол өнөрчүлүк, улуттук кийимдер, зергер буюмдар, текстиль жана тамак-аш азыктары коюлду. Форумдун коноктору экспонаттарды кызыгуу менен карап чыгып, чеберлерге суроолорун берип, жергиликтүү деликатестерден даам татышты.
Форумдун катышуучулары иш-чаранын жогорку деңгээлде уюштурулгандыгын белгилешип, түрк өлкөлөрүнүн ортосундагы экономикалык жана маданий байланыштар мындан ары да чыңдалат деген ишенимин билдиришти.
