Учурда өлкө боюнча 12 миң 659 ипотекалык батир курулуп жатат. Бул тууралуу жылдын жыйынтыгы боюнча Кыргызстандын социалдык-экономикалык өнүгүүсүнүн негизги көрсөткүчтөрү боюнча экспресс маалыматта айтылат.
Ага ылайык, “Мамлекеттик ипотекалык компания” ААК тарабынан ишке ашырылып жаткан 2024-2030-жылдарга “Менин үйүм” турак жай программасынын алкагында ири көлөмдөгү турак жай курулушу жүрүп жатат.
2024-жылдын декабрь айында Бишкек шаарындагы “Мурас” турак жай комплексинде 510 батир пайдаланууга берилди. Аталган турак жай комплексинин курулушу 2023-жылдын жазында башталган. Комплекс масштабдуу долбоор, анда 39 блоктон турган 4 миң 754 батир курулат.
Ошондой эле 2024-жылдын декабрында борбор калаанын Скрябин көчөсүндө 7 блоктон турган көп кабаттуу турак жай комплекси пайдаланууга берилген. Комплекс 7 блоктон турат, алардын ар бири 15 кабаттуу, жалпысынан 549 батир курулган.
