Дубалдары жарылып, полу чөгүп кеткен. Ала-Букада жаңы салынган мектеп кайра жабылды.
Падек айылындагы Т.Жоробаев атындагы орто мектептин имаратын салууга 59 млн 320 миң сом сарпталган. Бирок эксплуатацияга берилгенден кийин көйгөйлөр жарала баштаган.
Тагыраагы, пайдубалы кум-шагыл эмес, топурак менен толтурулгандыктан ички бириктирүүчү дубалдары, ашкана жана ички ажатканасынын, ошондой эле мектептин 1-кабатындагы кээ бир класстык бөлмөлөрдүн полдору 40 сантиметрге чейин чөгүп кеткен. Мунун кесепетинен дубалдарда жаракалар пайда болуп, мектеп көп өтпөй эле жабылып калган.
Прокуратура 2 берене боюнча иш козгогон. Анын ичинде мектепти салып жатканда жана аны кабыл алганда көзөмөлдүн жоктугу үчүн жергиликтүү бийликке карата да иш ачылды.
