25-октябрда Улуттук тарых музейинде Мамлекеттик кызмат жана жергиликтүү өз алдынча башкаруу иштери боюнча мамлекеттик агенттиктин түзүлгөндүгүнүн 20 жылдык юбилейине арналган иш-чара болуп өттү. Ага Мамлекеттик катчы Сүйүнбек Касмамбетов жана Жогорку Кеңештин вице-спикери Нурланбек Азыгалиев катышты.
Мындан тышкары, мааракелик салтанатка Жогорку Кеңештин депутаттары, Президенттин Администрациясынын кызматкерлери, Агенттиктин экс-директорлору, республиканын бардык аймактарынан келген мамлекеттик жана муниципалдык кызматкерлер келишти.
Агенттиктин директору Кудайберген Базарбаев куттуктоо сөзүндө азыркы кыргыз мамлекеттүүлүгүн түптөгөн аталарыбыздын эмгегин баса белгилеп, бүгүнкү күндө бийлик тарабынан өлкөнүн социалдык-экономикалык өнүгүүсүнө жана коопсуздугун бекемдөөгө чоң салымын кошкон олуттуу реформалар жүргүзүлүп жаткандыгын айтты.
Учурда президент Садыр Жапаровдун «Мамлекеттик жаңы кадр саясаты жөнүндө» Жарлыгына ылайык, агенттиктин приоритеттүү милдеттери — мамлекеттик жана муниципалдык кызмат, ошондой эле жергиликтүү өз алдынча башкаруу чөйрөсүндө бирдиктүү мамлекеттик саясатты өркүндөтүү, мамлекеттик жана муниципалдык кызматчылардын укуктарын жана мыйзамдуу кызыкчылыктарын, кадрлар резервин түзүү жана аларды тандоодо ачык-айкындуулукту камсыз кылуу болуп саналат.
Тактап кетсек, аталган агенттик 2004-жылы 18-сентябрда түзүлүп, мамлекеттик жана муниципалдык кызмат чөйрөсүндө бирдиктүү саясатты өркүндөтүү боюнча иштерди жүргузүп келишет.
