Садыр Жапаров Олимпиадага катыша турчу Кыргызстандын курама командасынын капитаны Акжол Махмудовго тууну тапшырды.
Президент жайкы Олимпиадага жолдомо алган спортчулар менен жолугуп, спортчулардан алтын күтөрүн, аларга ишенерин айткан.
“2021-жылы сиздер менен жолукканда жалпы максатыбыз 2024-жылдагы Париж Олимпиадасында биринчи орундарды камсыз кылуу, алтын медаль жеңүү деп айттым эле. Бул менин эле сөзүм эмес, элдин дагы суроо-талабы, үмүт-тилеги болгон. Мына ошол үмүт-тилектерди актоого мезгил келди деп ойлойм. Эгемен Кыргызстандын Олимпиада тарыхындагы биринчи алтын медалын жеңип, көз карандысыз Кыргызстандын 33 жылдыгына, Кара-Кыргыз автономиялуу облусунун түзүлгөндүгүнүн 100 жылдыгына карата белек кыласыңар деп бекем ишенем”, — деген Жапаров.
Олимпиадага Кыргызстандан 16 спортчу барат. Спорттук иш-чара 24-июлда башталат.
