Машыктыруучу Чынарбек Изабеков эркин күрөш боюнча ардагерлер арасындагы дүйнө чемпионатында күмүш утту.
Изабеков 51-56 жаштагы балбандар арасында 100 кг салмакта күч сынашты.
Ал таймашты 1/8 финалдан баштап, катары менен монголиялык, израилдик жана латвиялык спортчуларды жеңип, финалга чыккан.
Алтын байге үчүн Изабеков бейтарап туунун алдында күрөшкөн Александар Румин менен күч сынашып, 0:2 эсебинде жеңилди. Натыйжада ал күмүш байгенин ээси болду.
Белгилей кетсек, Изабеков 2015-жылдан бери дүйнө чемпионатына катышып келет. Андан бери ал бир да ирет дүйнө биринчилигинен байгесиз кайткан эмес.
Буга чейин ал ардагерлер арасындагы дүйнө биринчилигин 4 жолу жеңип, дүйнөнүн 4 жолку чемпиону болгон.
Чынарбек Изабеков — балбан кыз Мээрим Жуманазарованын жеке машыктыруучусу.
